და მაინც რაში მდგომარეობს ადამიანად ყოფნის მთელი ეს მისტიკა?! ხშირად ადამიანები სიცოცხლის წყურვილს და მისით ტკბობის უნარს კარგავენ და ასე ემსგავსება არსებობის დღეები სიზიფეს მითის ყველაზე მძიმე ლოდის დაუსრულებლად თრევას. რატომ გვემართება ასე, იქნებ ჩვენც სიზიფესავით აგდებული დამოკიდებულების გამო ვისჯებით, თუკი საერთოდ არსებობს სასჯელი მისი ადამიანური გაგებით…
დიდი ხანია დამჩემდა ფიქრი სამყაროსეული კანონების იმ მოდიფიცირებულ მოდელზე, რომელიც ჩვენ თავად გამოვიგონეთ, რომლითაც ტვინი გამოვიტენეთ და რომლის ტყვეებიც ვართ აგერ უკვე დიდი ხანია. სამყაროს საერთოდ არ სურს ვინმეს დასჯა! ყველა ეს “სასჯელი” ჩვენივე სცენარის ნაწილი, ჩვენივე გონებისა და წარმოსახვის ნაყოფი, იმიტომ რომ ჩვენ მიგვაჩნია თავი დასჯის ღირსად.
ალბათ სიზიფეც არ დაუსჯიათ ბერძნელ ღმერთებს თავისი სურვილით და თავად სიზიფეც თვლიდა თავს დასჯის ღირსად, აბსურდულად მიაჩნდა თავისი ყოფა ან მანაც, როგორც ათი ათასობით ადამიანმა ამ სამყაროში, არ იცოდა, როგორ ეპოვნა თავისი თავის უკეთესი ვერსია. სამყარო სინამდვილეში გვაძლევს ძალიან ბევრ შანსს და იმდენად ბევრ თავისუფლებას, რომ ადამიანთა მოდგმას გასროლილი ტყვიასავით ეშინია ამ სიტყვის გაგონების.